المشهد الرابع
في المسجد
بعد صلاة القيام
مايسة :
يااااااااااه ! ده أنا رجلي وجعتني كنت صليت في البيت أريح شوية وأصلي شوية
إيمان :
أفضل ما صلاتك ثوابها يضيع
مايسة : ما أنا باصلي هو انت عندك شك في كده؟
إيمان :
عارفة ومتأكدة إنك بتصلي ومواظبة بس بتسرقي فيها
مايسة :
باسرق؟ هي الصلاة فيها سرقة؟
ماجي :لو
بتيجي معانا الدروس كنت عرفتي إن الاستعجال في الصلاة بينقص من أجرك وثوابك وبتبقى
سرقة
شوشو وصل على سهوة :إيه اللي
فاتني ؟بتتكلموا على إيه يامايسة؟
مايسة : لكن ازاي أنا باسرق في
الصلاة لما أصلي في بيتنا؟
ماجي : انتي مش كنتي بتجري على
المسلسل بعد الصلاة وقبل الصلاة بتجري على ما يبدأ تصلي؟ما كنتيش تلحقي تقري آية
كاملة في الركعة
شوشو:هي مايسة ضاعت مني؟
يدخل شيطان آخر : إيه اللي بيحصل
بتزعق ليه؟
شوشو: خلاص مايسة شكلها انضمت
لهم
الشيطان التاني: احنا بنبقى
ضعفاء لما الكبار والمردة بيتسلسلوا في رمضان وكده احنا مش بيبقى لنا سلطان عليهم
شوشو:أمال ازاي ده كله بيحصل
والمردة مصفدين؟
الشيطان التاني: قبل ما يتصفدوا
بيجهزوا لكده لكن بني آدم وبنات حواء بإرادتهم يتبعوا الحق أو يتبعونا
مايسة :أنا حاروح أتفرج على
إعادة المسلسل اللي فاتني
شوشو: دي شكلها معايا لسه أما
أروح أساعدها
بينما تقول إيمان: يابنتي كملي
الشهر من غير مسلسلات ربنا يهديكي
مايسة : بعدين بعدين
............. يللا مش قايمين مروحين؟
شوشو: يللا انتي وسيبك منهم
ماجي : يللا يا إيمان
إيمان: أنا معتكفة في المسجد
ماجي : خلاص أشوفك في صلاة
التهجد إن شاء الله
شوشو: وأنا كمان
إيمان تفتح المصحف وتبدأ الختمة
التالتة ليها
ماجي ومايسة مشوا مع بعض مايسة
ما بطلتش كلام على الاستفتاء بتاعها
مايسة :ده يابنتي واحدة بتقول
إيه "مسلسل زهرة مش أد كده وهند صبري بتستظرف"
طب بتتفرج ليه؟ تدير القناة أحسن
، لا وكل يوم تدخل تعلق على حلقات المسلسلات كلها دي بقى المنافسة الوحيدة ليا في
الموضوع ده
ماجي : أنا بقى عايزة أنافس
إيمان دي حتبدأ الختمة التالتة ليها النهاردة وبقت في الاعتكاف وأنا متأخرة قوي
مايسة :والله أنا شايفة إنكم
غاويين تعب
ماجي :لو ما تعبناش لرضا ربنا
حنتعب علشان إيه؟
شوشو : ساعة لقلبك وساعة لربك
مايسة : بس إيمان مش بتريح كل
شوية صلاة وقرآن وواخدة موقف من المسلسلات مع إنها فيها ناس بتحب تتفرج عليهم
ماجي :لأن رمضان كله عبادة يا
مايسة رمضان مش مسلسلات
مايسة : طب بيعملوها ليه؟
يظهر شيطان والعياذ بالله كان
متابعاً للموقف ويصيح في شوشو
اعمل حاجة يا شيطان انت فالح بس
تنوح لما البت تروح منك؟
ادي واحدة راحت الحق التانية
شوشو:ما تخافش أنا حارجع ماجي زي
ما كانت معانا لازم أخليها تبعد عن ذكر الله
شيطان :لما نشوف بس لاحظ إنك
بتنخس كل شوية مش بتتعاظم
شوشو:الليلة هاتشوف التعاظم ومش
حانخس تاني
مايسة :احنا وصلنا وما فهمتنيش
انتي عايزة تقولي إيه بالظبط؟
ماجي : حاكلمك بالليل وأقولك
شوشو:ابقي قابليني يا ماجي
حاترجعي عن الطريق يعني حترجعي عن الطريق
*************
الساعة 2:30 صباحاً
إيمان مستنية ماجي اللي اتأخرت
على التهجد وخايفة أحسن تكون مايسة أثرت عليها
مايسة مستنية ماجي برضو علشان
تفهمهما ازاي بنكلم الله سبحانه وتعالى وهو بيكلمنا
دي تتصل.......... ودي تتصل
.........
فين ماجي؟
طب الأولى إننا نسأل شوشو فين
؟وإيه خططه بالنسبة لماجي؟
ممكن يكون خطفها؟؟!
يا شييييخة !!!
عمل اللي بيقدر عليه علشان ماجي
تفضل نايمة.......... ازاي؟
أولاً :جيران ماجي من عشاق
مسلسلات رمضان لما رجعت من صلاة القيام كانوا مخلصين يادوب عمل الكعك والبسكويت
فقاموا يشوفوا اللي فاتهم طبعاً في الإعادة الصوت كان عالي وهي مش عارفة تنام ولما
أخيييييييييييراً نامت كانت مجهدة جداً فلا حست بالتليفون ولا حست بالوقت
ثانياً : لما نامت ماجي شوشو عمل
تلات عقد عند رأسها وكل عقدها يضربها يقول عليك ليل طويل فارقدي
طبعاً مع الخطة الشيطانية دي
ماجي نامت ولا حست بحاجة أبداً
وقرر عدونا اللعين عليه لعنة
الله سبحانه وتعالى إلى يوم الدين أن يواصل مهمته حتى يعمى قلب ماجي عن ذكر الله
*************
في المسجد بعد صلاة التراويح اجتمعت
الفتيات الثلاث ، من الملاحظ أنه طول شهر رمضان نجح شوشو في إغواء مايسة لتضيع
ثواب الشهر الكريم لكنه لم يستطع إبعادها عن أداء الصلوات لذلك كانت تواظب على صلاة القيام سواء في
المسجد أو المنزل .
إيمان : ماجيتيش ليه التهجد يا
ماجي؟
مايسة : وما اتصلتيش بيا زي ما
قلتي!
ماجي: حقيقي أنا متأسفة الجيران
كانو سهرانين بيتفرجوا على التليفزيون علشان أقاربهم كانوا عندهم وناموا متأخرين
ومقدرتش أنام غير متأخروللأسف ضاعت علي صلاة الفجر في موعدها
مايسة : مش مهم كنت تصليها لما
تصحي .
إيمان : مش مهم ده إيه؟ دي صلاة
الفجر في وقتها مهم جداً وليها ثواب عظيم .
مايسة : طب قوليلي ازاي بنتكلم
مع ربنا؟ وربنا بيتكلم معانا ازاي؟ أنا فكرت إننا لما بندعي بنكلم ربنا لكن ربنا
بيكلمنا ازاي؟
ماجي : أولاً يا مايسة تقولي
ربنا سبحانه وتعالى أو تقولي الله سبحانه وتعالى ، ثانياً : حتعرفي ده في الدرس
النهارده
******************
بعد درس التراويح تخرج الفتاتان
مع إيمان لقضاء حاجة لصديقة لهم إيمان تبتسم لمايسة وماجي وتقول لهما : درس مفيد
جداً أول مرة أعرف المعلومات دي حاجة جميلة عن أهمية الصلاة والدعاء في حياة
المسلم
مايسة : عندك حق وفهمت ازاي بنكلم
الله سبحانه وتعالى لما بنصلي وبندعي بنتكلم معه ولما نقرأ القرآن يكلمنا الله
بالأوامر والنواهي والترغيب والترهيب وأحلى ما في القرآن إننا لما بنقرأه نكتشف كل
جديد فيه فلا ينضب كل ما فيه أبداً علشان كده استمر لغاية دلوقتي
ماجي وإيمان تبتسمان لمايسة أما
شوشو فأخذيتضاءل حجمه مع كل كلمة تنطقها مايسة تلميذته المفضلة ........... سابقاً
*************************
