وثالثهم الشيطان .. المشهد الثاني

المشهد التاني

في البيت

أثناء رمضان

ماجي عازمة صديقتيها مايسة وإيمان على الإفطار

فاتحة القرآن وهي في المطبخ بتجهز للأكل ملخومة عمالة تعصر في الطماطم وتنقي الرز وتفصص توم وتبشر بصل وبتقول: ياريتني عملت زي إيمان مجهزة كل حاجة قبل رمضان مش ملخومة زي حالاتي

شوشو على سيرة إيمان حصلت معاه لخبطة  فقعد يوسوس لها :

انتي رجلك واجعاكي اقعدي ارتاحي قريب من التليفزيون واتسلي

ده المسلسل اللي بتحبيه بتاع عايزة أتجوز حيبدأ .

ماجي :أنا عايزة أتفرج على هند صبري أما أشوف حتعمل إيه النهارده ، بس الأكل أنا متأخرة فيه قوي وكله بيتعاد أبقى أشوفه في الإعادة .

شوشو: إعادة إيه بس ياعبيطة ده كده حيبقى اتحرق وحتعرفي اللي حصل قبل الإعادة

ماجي : مش مهم يتحرق أفضل من الأكل ما يتحرق على النار وأنا باتفرج

وتمد إيدها تعلي صوت القرآن فيعلو صوت الله سبحانه وتعالى " وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللّهِ إِنَّهُ سَمِيعٌ عَلِيمٌ . إِنَّ الَّذِينَ اتَّقَواْ إِذَا مَسَّهُمْ طَائِفٌ مِّنَ الشَّيْطَانِ تَذَكَّرُواْ فَإِذَا هُم مُّبْصِرُونَ . وَإِخْوَانُهُمْ يَمُدُّونَهُمْ فِي الْغَيِّ ثُمَّ لاَ يُقْصِرُونَ  ."

فينكس الشيطان وينصرف إلى تلميذته المفضلة مايسة التي استيقظت تواً من النوم بعد مشاهدة إعادة المسلسلات كلها

وتفتح التليفزيون على مسلسل عايزة أتجوز فيوسوس لها شوشو:

حلقة جامدة مش كده ما تتصلي بماجي تتفرج عليها علشان تناقشوه سوا على الافطاربدل ما هي ملخومة ياعيني في المطبخ

تمد مايسة يدها للموبايل وتتصل بماجي : الحلقة حلوة قوي ياماجي شوفيها

عايزة أتكلم معاكي فيها على الافطار

ماجي : حلقة إيه انتي كمان أنا باجهز الافطار اتفرجي عليها واحكيها لي

شوشو:لا خليها تشوفها

مايسة : يابنتي دي مش بتتحكى دي بتتشاف

ماجي : باقولك إيه يامايسة اتفرجي واحكيها لي أنا مش فاضية مع السلامة

هزيمة لشوشو

***********

قبل الإفطار بنص ساعة تصل إيمان وتجلس في الأنتريه وتقرأ أذكار المساء بينما ماجي في المطبخ تعد العصائر بعد قليل تقوم وتحضر معها السفرة وعندما يضرب المدفع تصل مايسة لاهثة وقبل ما تفطر تقول لماجي افتحي بسرعة التليفزيون زمان الحلقة بدأت

إيمان تمد لها كوب ماء وهي تقول : مسلسل إيه ؟ مش اتفقنا رمضان صلاة وصيام وقرآن وعبادة ؟

تشرب مايسة وتقول : ما أنا بنقرا وباصلي وصايمة كمان وبعدين أنا متابعة المسلسل ده حلو قوي ولو فاتتني حلقة مش حافهم اللي حايحصل في الباقي .

تحضر ماجي التليفزيون وتفتحه وتشاهد إيمان المسلسل رغماً عنها وهي تعلق على كل ما فيه :

ده لبس يلبسوه في شهر العبادة

شششششششششش

ده صوت مايسة اللي مركزة قوي في الحلقة أكتر ما بتشرب

إيمان : ششششششششش إيه ده حرام والله اللي بيعملوه ده لا ولسه بيصوروا فيه وهم صايمين

صحيح إذا لم تستحِ فافعل ما شئت.

ينتهي الإفطار ويساعدوا ماجي في تنظيف السفرة والأطباق

إيمان : يللا علشان نلحق الصف الأول قبل المسجد ما يزدحم

ماجي: انزلي احجزي لنا واحنا جايين وراكي

إيمان : حبيبتي المسجد والصف الأول مش بالحجز الصف الول بسرعة الاستجابة

مايسة : طيب انزلي واحنا نازلين وراكي بعد شوية

إيمان : لا حول ولا قوة إلا بالله ........ طيب

يفرح شوشولابتعاد إيمان ويلح على مايسة كيلا تنزل للمسجد : انتي رجلك واجعاكي مش بتحبي تقفي كتيرفاكرة السنة اللي فاتت

كل يوم ترجعي مكسرة وتحطي رجلك في مية سخنة وبعدين المسلسل التاني حيفوتك

ماجي تلبس وتنزل مع مايسة للمسجد مايسة :

باقولك إيه انا رجلي واجعاني حاروح أصلي في البيت

ماجي : رجلك اللي واجعاكي ولا حلقة المسلسل؟

تضحك مايسة وتنصرف بإيحاء من الشيطان حتى لا تهزمها ماجي وهما قريبتان من المسجد

تدخل ماجي المسجد وتبحث عن مكان لتصلي فلا تجد فتعود للبيت لتصلي فيه تتصل بها إيمان بعد الصلاة : انتي فين؟

ماجي : المسجد كان زحمة ومالقيتش مكان

إيمان : علشان تسمعي الكلام بعد كده ضيعتي عليكي صلاة الجماعة ومايسة أكيد روحت

ماجي : رجلها وجعتها

إيمان : طيب أشوفكم في الكلية مع السلامة

ماجي تتصل بمايسة : احكي لي حلقة المسلسل

شوشو: يافرحتي هاهاهاهاها

مع الأسف انتصار لشوشو

*****************