حاجة مستفزة لما الواحدة تكون ماشية في الشارع وفجأة تلاقي كيس "زبالة" اتحدف من فوق أو ورق أو قشر توم .. وبعدين تطلع من الشارع ده على الترعة ، يا سلام بقى لما تكون منظرها بالليل يخلب العقل .. لكن بدل ما نشوف المنظر الحلو ده نلاقي كوم طوب .. عفواً جبل طوب بيسد الطريق إلى المنظر، والأسوأ لما الناس تفتكره كوم زبالة وترمي بقى ...
واحدة شايلة القمامة من بيتها ونازلة ترميها ، مفيش صندوق ! تلاقي إيه ؟؟ سد طوب جنب منه واحدة رامية كيس .. وواحدة رامية ورق .. وواحد رامي علبة سجاير فاضية تعمل إييييه؟ .. ارررمي... ولسان حالها بيقول " يعني أنا اللي بوظت شكل المنطقة؟ اللي رمى الأول هو المسئول" وترمي ..
تيجي واحدة تانية محموقة قوي من النظافة واخدة كيس "الزبالة" ونازلة وهي جديدة في المنطقة ومالحقتش تتعرف يعني ، شايلة كيسها وماشية بتدور على صندوق ترمي فيه وماشية ماشية ... وبدل ما تلاقي صندوق تلاقي ما بداخل الصندوق ، ترمي عليه يعني ولا تمشي تدور على صندوق؟ قالت أمشي أحسن يمكن ألاقي! .. نص ساعة وهي شايلة الكيس وماشية ومفيش صندوق ، مكان الصندوق بتلاقي حد قلب الصندوق وأخده يعملوا بيه إيه.... معرفش !! إيه الحل؟؟؟ اضطرت ترمي من إيدها وهي بتقول "مضطرة"..
نفسي ألاقي حد يحترم مدينته ويحبها قبل ما يسخط عليها علشان تبادله الحب بدل الكره والسخط
قبل ما نقول ما فيش حاجة اتغيرت نبدأ بنفسنا ونتغير احنا وتدريجياً حانغير كل اللي حوالينا
ليست هناك تعليقات:
إرسال تعليق
♥ يسعدني معرفة رأيكم فيما كتبت :)